Ég er búin að vera prófa mig áfram með heimatilbúið granóla og er á því að ég sé búin að mastera það núna! Að minnsta kosti hef ég aldrei fengið jafn mikið af hrósum fyrir granóla og þetta.
Það er svo bragðgott, fullkomlega stökkt og síðast en ekki síst troðfullt af allskonar hollum innihaldsefnum sem næra líkamann og sál.
Fullkomið til að njóta með uppáhalds skyrinu eða jógúrtinu.
Uppskrift og myndir frá Lindu Ben.
Innihaldsefni
-
300 g hafrar
50 g möndlur
50 g pekan hnetur
50 g graskersfræ
70 g kókosflögur
2 tsk kanill
1/2 tsk salt
1 dl hlynsíróp
110 g brædd kókosolía
1 tsk vanilludropar
1 eggjahvíta
50 g goji ber
70 g saxaðar döðlur
Aðferð
-
- Kveikið á ofninum og stillið á 160°C, undir og yfir hita.
- Setjið hafra, saxaðar möndlur, saxaðar pekanhnetur, graskersfræ, kókosflögur, kanil og salt í skál. Hrærið saman.
- Setjið hlynsíróp, brædda kókosolíu og vanilludropa í skál og blandið saman.
- Hellið kókosolíu blöndunni út í þurrefnablönduna og blandið öllu saman þannig allt verði hjúpað í olíu.
- Þeytið eggjahvítuna þar til millisstífir toppar hafa myndast. Blandið öllu vel saman.
- Hellið blöndunni á smjörpappísklædda ofnplötu, dreifið úr blöndunni þannig að hún þekji alla plötuna og pressið hana niður. Bakið í 20-25 mín eða þar til granólað er aðeins byrjað að gyllast.
- Takið úr ofninum og á meðan það er ennþá heitt, dreifið goji berjum og söxuðum döðlum yfir, látið það kólna fullkomlega.
- Brjótið það gróft upp og geymið í lokuðu íláti.
Verði þér að góðu!
